әскери-теңіз флоты

(Военно-морской флот)

мемлекеттің қарулы күштерінің бір бөлігі. Ә-т.ф. дербес те, қарулы күштердің басқа түрлерімен бірігіп те теңізде, мұхитта, өзен-көлдерде соғыс қимылдарын жүргізеді. Ірі мемлекеттердің Ә-т.ф., әдетте, су беті күштері мен су асты күштерінен, теңіз авиациясы мен ракета бөлімдерінен, жағалық артиллериядан, әуе шабуылынан қорғаныс күштерінен, теңіз-жаяу әскерлерінен, арнаулы бөлімдерден құрылады. Олар ракета, ядролық қарулардың түрлерімен, артиллерия, торпеда және т.б. құралдарымен жабдықталады. Ә-т.ф. қарсыластардың күшін есепке ала отырып құрама, флот және флотилиядан құрылады. Әр флоттың (флотилияның) құрамына түрлі қарулы күштердің құрамдары, бөлімдері, басқару органдары, әскери-теңіз авиация базалары кіреді. Флоттың қарсыласқа негізгі соққы беретін ең басты түрлері – су асты күштері мен теңіз авиациясы. Ә.-т.ф-ның күштері атқаратын қызметіне қарай: кеме, крейсер, авианосец, сүңгуір қайық, катер болып бөлінеді. Соғыс кезінде кемелер бөлімшеге, бөлімге, құрамаға бөлініп басқарылады. Ә-т.ф-ның авиациясы — Ә-т.ф. күштерінің құрамды бөлігі. Ол теңізде дербес немесе флот күштерімен өзара байланыста қимыл жасауға, теңіз жағалауындағы құрлық әскерлерін қолдауға арналады. Ә-т.ф. авиациясы соғыс қимылын жүргізгенде қарсыластың теңіздегі және базалардағы кемелеріне, көлік-десант жабдықтарына соққы береді, жағалық объектілерін қиратады, сүңгуір қайықтарын жояды, т.б. жауынгерлік міндеттерді орындайды. Ә-т.ф. авиациясы ракета алып жүретін теңіз авиациясы бөлімдерінен, сүңгуір қайыққа қарсы қолданылатын, т.б. авиация түрлері бөлімдерінен тұрады.